YOLO

You only Live once  ..  هتعيش حياتك مرة واحدة بس

لو المفهوم ده قدرت فعلا تستوعبه .. حياتك بجد هتتغير كتير .. ده انت كمان في حاجات كتير ممكن تعملها مش عشان إنت عاوز تعملها أو محتاج تعملها .. لكن عشان إنت خلاص قدرت تؤمن بمفهوم إنك ليك حياة واحدة ممكن تعمل فيها الحاجة دي .. فلازم تعملها 

 أنت عارف إنك هتعيش مرة واحدة بس عشان تقرأ .. تتعلم .. تتثقف .. تذاكر .. تبدع .. تكتشف .. تحاول ..
أنت عارف إنك هتعيش مرة واحدة بس عشان تلعب .. تجري .. تروح الجيم .. تتجنن .. تخرج .. تسافر ..
أنت عارف إنك هتعيش مرة واحدة بس عشان ترضي أبوك و أمك .. تخليهم فخورين بيك .. تخليهم مبسوطين ..
أنت عارف إنك هتعيش مرة واحدة بس عشان تصلي .. تحفظ القرآن .. تفهم دينك .. تعيش حياتك صح ..
إنت عارف إنك هتعيش حياتك مرة واحدة بس عشان تختار أصحابك و تحبهم و تشاركهم و تتشاكل معاهم و ترجع تصالحهم ..

إنت عارف إنك هتعيش حياتك مرة واحدة بس تقتنع بكل اللي فات ده و تعمله صح .. هتعيش حياتك مرة واحدة بس عشان تعيشها 

صح .. عشان تسيبها و أنت مبسوط أو و إنت ندمان ....

يعني تصور إن إنك خلاص اقتنعت فعلا إن حياتك دي هتعيشها مرة واحدة و بدأت تعيش على الأساس ده .. بدأت فعلا تذاكر و تتعلم و تقرأ و تنظم وقتك و تلعب و تخرج و تهتم بنفسك و بصحتك و بجسمك و تحاول قدر الإمكان ترضي أبوك و أمك و كمان بترضي ربنا و بتطيعه و بتحاول تبعد عن كل المعاصي .. بتحب الناس .. بتحب أصحابك ... بس المرة دي , إنت بتعمل كل ده مش عشان حد بيجبرك على كده .. بتعمل كل ده و إنت مش مضايق و بتعمله غصب عنك ... إنت بتعمل كل ده المرة دي لإنك خلاص مقتنع إنك مش هتعيش مرتين عشان تسيب حاجة من الحاجات دي للمرة الجاية ..

يعني بص بقى عشن تبقى فاهم يعني .. لو حطيت في دماغك إنك هتعيش مرة واحدة بس ,, هتعمل كل حاجة نفسك فيها , هتجرب كل حاجة تخطر على بالك , مش هتضيع ولا ثانية على حاجة ماتستهلش

أحبك بكل الحروف

أ .. أريدك لأني أحبك

ب .. بحب أشوفك

ت .. تايه في عيونك مبسوط

ث .. ثمة ضحكة أعشقها تخرج منك

ج .. جمالك فاق جمال النجوم

ح .. حلمي أن أراك دوما

خ .. خائف أنا من الفراق

د .. دوما أنت سبب سعادتي

ذ .. ذاد عشقي لك  

ر .. روحك أحلى ما رأيت

س .. سعيد أنا بحبك

ش .. شعرك حرير

ص .. صوتك أرق من صوت العود

ض .. ضاعت سعادتي في غيابك

ط .. طرت من الفرحة لما عرفتك

ظ .. ظمأي يزداد في بعدك

ع .. عينى تحب رؤيتك

غ .. غني أنا بمعرفتك

ف .. فرحان أنا إذا تذكرتك

ق .. قلبى عاشق لك

ك .. كلماتي كلها من أجلك

ل .. ليالي الحب عرفتها لما وجدتك

م .. مهموم أنا كلما تذكرت بعدك عني

ن .. ناء أنا عن مضايقتك

هـ .. هائم أنا في عشقك

و .. وليد لحظة رؤيتك

ي .. يا من أحبها بجنون

طرقت بابك يا الله

ربنا سبحانه و تعالى بيقول " و إذا سألك عبادي عني , فإني قريب أجيب دعوة الداعي إذا دعاني " .. يعني لما تحتاج أي حاجة .. أنت مش محتاج فعلا غير إنك تدعي ربنا و هو قالك إنه هيستجيب ..

أنت عارف إن بإيمانك بربنا أي دعوة هتدعيها هيستجيب على طول فعلا .. بس ربنا عارف امتى أنت محتاج الحاجة اللي بتدعي عشانها .. عشان كده أنت بس ادعي ربنا .. و هيستجيب ,, ممكن يستجيب على طول .. و ممكن تتأجلك الاستجابة لفترة معينة .. و ممكن تتأجلك الاستجابة ليوم القيامة ..

أنت بس كل اللي محتاجة إنك تدعي .. و صدقني ربنا هيستجيب .. بس إنت برده محتاج شوية حاجات كده عشان دعوتك دي تكون سليمة و تستجاب ..

تفتكر لو في ابن بيعصي والده .. هل ممكن الابن ده يطلب حاجة من والده ؟ .. طب هل والده هيستجيبله ؟ ,, بالظبط كده , لازم تكون علاقتك مع ربنا كويسة .. بتطيعه .. مؤمن بيه و الأهم إنك مؤمن فعلا إن ربنا قادر في أي وقت إنه يستجيب لدعائك مهما كان .. عشان كده و أنت رايح تدعي ربنا .. استدعي جواك طاقة إيمانية كبيرة .. لازم تشعر بحلاوة الإيمان .. لازم تكون واثق إن ربك هو اللي خلقك .. و هو اللي قادر إنه يستجيب لدعاك ..

مش بس كده .. إنت كمان محتاج تخلق جواك طاقة إيجابية عالية .. تصور إنك قاعد تدعي مثلا إن ربنا يرزقك بمليون جنيه و إنت في نفس الوقت من جواك قاعد تقول أنا عمري ما هيبقى عندي مليون جنيه .. متصور إن الطاقة السلبية اللي إنت خلقتها لنفسك دي هتتناسب مع عظمة الطلب اللي أنت بتطلبه من ربنا ..

المعادلة بسيطة جداا .. الدعوة اللي إنت بتدعيها حاجة إيجابية و بالتالي لازم تولد جواك طاقة إيجابية عشان الدعوة دي تجيلك .. بس برده حابب أقولك إنك طالما دعيت ربنا بثقة و إيمان فربنا خلاص استجابلك .. الحكاية بس إن محتاج تولد جواك طاقة إيجابية عشان الدعوة تستجابلك .. لكن لو مقدرتش تولد الطاقة الإيجابية دي .. متقلقش .. الاستجابة بس هتتأجل لغايت ما تقدر .. و لو مقدرتش خالص طول حياتك .. برده متقلقش .. ربنا هيستجيب ليك يوم القيامة بثواب عظيم على دعوتك ليه بثقة و إيمان ..

يعني من الآخر .. لو دعيت ربنا و قلتله يا رب أنا عايز مليون جنيه و قدرت مع الدعوة تولد جواك طاقة إيجابية بإن ربنا هيتقبل دعوتك أكيد .. و إنك كمان تبدأ تزود طاقتك الإيجابية دي بإنك تتخيل و كأن الدعوة خلاص ربنا استجاب ليها و تبدأ تفكر هتعمل ايه بالفلوس ... الخ ,, صدقني ربنا هيستجيب فعلا ..

أنت ممكن تعمل كده مع أي حاجة في حياتك .. و الله أنا جربت فعلا .. طب جرب أنت كمان كده  !