لو أن التدخين رجل .. لقتلته

عشان الكلام يبقى واضح و صريح ,,

بالنسبة لــيــا , أي حد بيشرب سجاير أو شيشة عنده مشاكل نفسية , و ضعيف الشخصية وكمان شخص مضر أكتر من السجاير و الشيشة نفسهم ,,

لو حد شايف إن أنا كده متخلف .. فلو رفضي للتدخين معناه إني متخلف .. فأنا عاوز أفضل متخلف كده على طول ,,

اللي بيشرب سجاير : كلمني أكتر عن الحاجة العظيمة اللي في السجاير , و عن ريحتك الجميلة , و عن الفلوس اللي بتصرفها عشان تجيب حاجة تنفخ فيها فتطلع دخاان *انبهار عظيم أوي* ,, كلمني كمان عن إنك بقيت مدمن . و لو قلتلك بطلها .. محتاج تعمل مجهود واحدة حاامل و هي بتولد .. و احتمال كبير متقدرش .. !!

اللي بيشرب شيشة : كلمني أكتر عن إنك بتنزل مخصوص تروح تقعد في قهوة تدفع فلوس عشان تنفخ برده فتطلع دخان .. و لما أسألك إيه الجميل .. تقولي أصل طعمها حلو ,, أنا عايزك تروح تجرب الصراصير بيقولوا طعمها جامد جدا و جواها Hot sauce طبيعي كماان .. !!

لو حد بعد الكلام ده مضايق مني .. فأنا آسف لو كنت ضايقتك بس صدقني ,, إنت لو مبتشربش الحاجات دي هتبقى أحسن :) !

إن لم تزد على الحياة شيئاً كنت أنت زائداً عليها

( إن لم تزد على الحياة شيئاً كنت أنت زائداً عليها ) - مصطفى صادق الرافعي

أنت ضفت إيه للحياة ؟ أنت بتعمل إيه في حياتك ؟ أنت قادر تسيب بصمة في الحياة ؟
طيب , هل أنت عارف أنت عايش ليه ؟ هل أنت حاسس بقيمة نفسك ؟ هل أنت راضي عن اللي أنت بتعمله ؟

لازم تكون عارف إن وجودك في الحياة مش معناه إنك تاخد و تستهلك من غير أي عطاء أو إنتاج ,,
لازم تكون عارف إن كل حاجة بتعلمها في حياتك بتسيب أثر سواء كان كويس أو لأ ,,

فكرة إنك تأثر في حياة الناس حواليك .. فكرة سهلة و بسيطة ,,
- ممكن تجرب تأثر في حياة الناس بابتسامتك ,, بضحكتك ,, بتفاؤلك ,, و بطيبتك ..
- ممكن تجرب تأثر في حياة الناس بعقلك ,, بحكمتك ,, بذكائك ,, و بكلامك ..
- ممكن تجرب تأثر في حياة الناس بكتاباتك ,, بقراءاتك ,, بنصايحك ,, و بأفكارك ..

و الحقيقة أن التأثير في الحياة و ترك بصمة على جدارها يتبلور من وجهة نظري في شيء واحد ألا و هو أن تكون حريصا دائما على العطاء ,,
فأنا أرى أنك إذا ما أعطيت شيئا ما .. فإنك تحقق نفس الشعور الوجداني عندما تأخذ شيئا ما ,,

- بكل بساطة " فرحتك بما أخذت تساوي فرحة غيرك بما أعطيته "
 فشعورك بسعادة الآخرين عند مساعدتهم و تقديم العطاء لهم هو في الواقع يساوي و قد يفوق سعادتك عند أخذ شيئا ما منهم ,,

- حياتك ملكك .. قد تموت وحيدا لكن تعيش ,, و قد تعيش وحيدا ثم تموت !

خليك حريص إنك تسأل نفسك دايما ,, أنت قدمت إيه للناس من حواليك ؟ و لسة هتقدم إيه كمان ؟

جـــرّب

Trying new things enriches your life ,,

If you avoid trying new things , then how poor is your life .. !!

ممكن أطلب منك حاجة كده :

ممكن تجرب كل يوم حاجة جديدة ,,
ممكن متقولش خالص إن اللي تعرفه أحسن من اللي متعرفوش ,, 

ممكن تحط هدف لنفسك إنك كل يوم , تصحى من النوم .. تبتسم .. تقول انهاردة هيبقى أحسن يوم في حياتي .. تستمتع بكل حاجة بتعلمها في اليوم ده .. تحاول تعمل حاجة جديدة أو على الأقل تعمل الحاجة بطريقة جديدة .. أو حتى اعمل الحاجة بطريقة عادية بس اعملها كأنك أول مرة بتعملها .. كأنها فعلا حاجة جديدة

كل لما بتعمل حاجة جديدة في حياتك .. بتفرق معاك فعلا .. بتضيف ليك حاجات كتير .. ساعات كتير أو يمكن دايما , الخبرة اللي بتكتسبها في حياتك من التجربة هي اللي بتحدد أنت مين و حياتك أزاي ,, فتصور إنك بتتجنب إنك تجرب حاجة جديدة . هتبقى فين بقى الخبرة اللي بتكتسبها .. ساعتها بقى هتبقى أنت مين ؟

تاني و تالت و عاشر ,, أنت هتعيش حياتك مرة واحدة بس عشان تجرب و تغلط و تتعلم و تجرب تاني و تستفيد و بين كل ده و ده حياتك هيبقى ليها معنى و هيبقى ليها متعة .

بس ,, حط في دماغك إن أي حاجة هتعملها في حياتك لازم تخليها متأثرش على علاقتك بربنا .. إنك تجرب حاجة جديدة شيء كويس بس أهم حاجة متعصيش ربنا .. الحاجة الجديدة اللي بتعملها دايما حلوة إلا إذا كنت بتاخد عليها سيئات ..

الدنيا مش أصغر من إنك تدخل كلية الطب ..

الدنيا مش أصغر من إنك تدخل كلية الطب ..

الدنيا مش أصغر من إنك تحاول إنك تنجح .. تحاول إنك تفرح أهلك و تخليهم فخورين بيك .. تعمل حاجة إنت بتحبها ..
لو دخولك كلية الطب هيحققلك كل ده ,, يبقى الدنيا مش أصغر من إنك تدخلها ..

أنا عارف قد إيه كل الناس اللي في كلية الطب بيشوفوا المر و العذاب و التعب و حاجات كتير .. أنا شربت من كل ده , و ياما لسة هشرب ,, بس كل التعب ده لو قارنته بإحساسك لما حد يكون تعبان و يسألك عن حاجة وتوصفله علاج .. لو قارنته بفرحة مامتك اللي بتشوفها في عينيها لما تقول ابني الدكتور راح و ابني الدكتور جه D : ,, أكيد هتنسى كل التعب ..

أنا بفتكر دلوقتي مشهد من مسرحية مدرسة المشاغبين لما كانت الأبلة D: بتقول أنا ضيعت من عمري 10 سنين و لسة كمان هضيع 10 سنين في دراسة المنطق ,, طبعا ده علم و العلم لا يقدر بمال..... و لو هنتكلم عن العلم بقى فالإمام الشافعي - رحمه الله تعالى بيقول


: (( إنما العلم علمان : علم الدين وعلم الدنيا .

فالعلم الذي للدين هو الفقه والعلم الذي للدنيا هو الطب )) ..


الدنيا زي ما فيها السهل فيها الصعب ,, و زي ما فيها الراحة فيها التعب , و إذا كان التعب في الدنيا هدفه إنك تبقى شخص ناجح و إنك تساعد الناس و إنك تكون سبب في شفائهم.. فده أكيد أحلى تعب ... و لو انت متخيل كمية الدعوات اللي بيدعيها المرضى للدكاترة , و كمية الثواب اللي انت هتاخده ,, هتعرف إن الدنيا مش أصغر من إنك تدخل كلية طب و لا حاجة ..

فلو كانت حياة الواحد بتتحسب باللحظات اللي بيبقى فيها فخور بنفسه و بالحاجة اللي بيعملها .. و لو كانت حياة الواحد بتتحسب باللحظات اللي الواحد بياخد فيها حسنات .. و لو كانت حياة الواحد بتتحسب باللحظات اللي بيوهب فيها الإنسان نفسه لمساعدة الآخرين .. و لو كانت حياة الواحد بتتحسب بالعلم و القراءة و الاطلاع ,, فده معناه إن الواحد لازم يدخل كلية الطب ..

الأمل مفتاح بيبان

الفرق بين الأمل و اليأس هو بالظبط الفرق بين واحد عايش و واحد ميت .

الإنسان اللي عنده أمل مش هيبص غير للمستقبل و الماضي مش هيأثر عليه عكس الشخص اليائس اللي الانهزامية مسيطرة عليه

لما يكون عندك أمل .. هتقدر تحلم .. تتخيل .. ترسم لنفسك صورة في المستقبل .. هتلاقي الدنيا فيها إشراق .. فيها حب ,, هتقدر تنسى كل مصاعب و ظروف الماضي

لما تغيب عنك أحلامك .. لما تلاقي نفسك ضعيف .. لما عقلك ينسى كل شيء كويس .. يبقى أنت كده اليأس امتلكك .. يبقى أنت كده عايش ليه !

بس برده الأمل مش معناه إنك تعيش في أوهام .. لكن معناه إنك تصنع جواك طاقة أيجابية تقدر تكمل بيها حياتك في وسط كل طريق صعب .. عشان تقدر تفكر في النجاح

عارف إنت لما تبص لنفسك تلاقي حياتك صعبة و أملك ضعيف .. لكن لما تبص لغيرك تحس إنه في أحسن حال ,, مش المفروض تعمل كده ,, مش المفروض تعمل مقارنات أصلا

لما تلاقي حد غيرك ناجح , مبدع و مليان بالأمل و التفاءل .. متخليش ده يضعفك و يحسسك إنك مش هتقدر .. لأ , ده إنت المفروض تاخد ده قدوة و مصدر إلهام ليك لإنك تتفاءل برده

حاول يكون الأمل هو اللي بيحركك .. التفاؤل و العزيمة هما اللي بيساعدوك .. عشان تقدر تحدد لنفسك هدف .. عشان تقدر تحققه .. عشان تقدر تنجح في حياتك

عشان تنجح .. لازم تعرف إن ده صعب .. و عشان تقدر تتجاوز الصعب ده .. لازم يكون عندك أمل و عزيمة و إرادة

أهم حاجة تكون حاطط في دماغك إن لما تصبر .. لما تتعلم من كل موقف في حياتك .. لما تجدد جواك الأمل كل شوية .. يبقى أنت كده أكيد هتوصل

YOLO

You only Live once  ..  هتعيش حياتك مرة واحدة بس

لو المفهوم ده قدرت فعلا تستوعبه .. حياتك بجد هتتغير كتير .. ده انت كمان في حاجات كتير ممكن تعملها مش عشان إنت عاوز تعملها أو محتاج تعملها .. لكن عشان إنت خلاص قدرت تؤمن بمفهوم إنك ليك حياة واحدة ممكن تعمل فيها الحاجة دي .. فلازم تعملها 

 أنت عارف إنك هتعيش مرة واحدة بس عشان تقرأ .. تتعلم .. تتثقف .. تذاكر .. تبدع .. تكتشف .. تحاول ..
أنت عارف إنك هتعيش مرة واحدة بس عشان تلعب .. تجري .. تروح الجيم .. تتجنن .. تخرج .. تسافر ..
أنت عارف إنك هتعيش مرة واحدة بس عشان ترضي أبوك و أمك .. تخليهم فخورين بيك .. تخليهم مبسوطين ..
أنت عارف إنك هتعيش مرة واحدة بس عشان تصلي .. تحفظ القرآن .. تفهم دينك .. تعيش حياتك صح ..
إنت عارف إنك هتعيش حياتك مرة واحدة بس عشان تختار أصحابك و تحبهم و تشاركهم و تتشاكل معاهم و ترجع تصالحهم ..

إنت عارف إنك هتعيش حياتك مرة واحدة بس تقتنع بكل اللي فات ده و تعمله صح .. هتعيش حياتك مرة واحدة بس عشان تعيشها 

صح .. عشان تسيبها و أنت مبسوط أو و إنت ندمان ....

يعني تصور إن إنك خلاص اقتنعت فعلا إن حياتك دي هتعيشها مرة واحدة و بدأت تعيش على الأساس ده .. بدأت فعلا تذاكر و تتعلم و تقرأ و تنظم وقتك و تلعب و تخرج و تهتم بنفسك و بصحتك و بجسمك و تحاول قدر الإمكان ترضي أبوك و أمك و كمان بترضي ربنا و بتطيعه و بتحاول تبعد عن كل المعاصي .. بتحب الناس .. بتحب أصحابك ... بس المرة دي , إنت بتعمل كل ده مش عشان حد بيجبرك على كده .. بتعمل كل ده و إنت مش مضايق و بتعمله غصب عنك ... إنت بتعمل كل ده المرة دي لإنك خلاص مقتنع إنك مش هتعيش مرتين عشان تسيب حاجة من الحاجات دي للمرة الجاية ..

يعني بص بقى عشن تبقى فاهم يعني .. لو حطيت في دماغك إنك هتعيش مرة واحدة بس ,, هتعمل كل حاجة نفسك فيها , هتجرب كل حاجة تخطر على بالك , مش هتضيع ولا ثانية على حاجة ماتستهلش

أحبك بكل الحروف

أ .. أريدك لأني أحبك

ب .. بحب أشوفك

ت .. تايه في عيونك مبسوط

ث .. ثمة ضحكة أعشقها تخرج منك

ج .. جمالك فاق جمال النجوم

ح .. حلمي أن أراك دوما

خ .. خائف أنا من الفراق

د .. دوما أنت سبب سعادتي

ذ .. ذاد عشقي لك  

ر .. روحك أحلى ما رأيت

س .. سعيد أنا بحبك

ش .. شعرك حرير

ص .. صوتك أرق من صوت العود

ض .. ضاعت سعادتي في غيابك

ط .. طرت من الفرحة لما عرفتك

ظ .. ظمأي يزداد في بعدك

ع .. عينى تحب رؤيتك

غ .. غني أنا بمعرفتك

ف .. فرحان أنا إذا تذكرتك

ق .. قلبى عاشق لك

ك .. كلماتي كلها من أجلك

ل .. ليالي الحب عرفتها لما وجدتك

م .. مهموم أنا كلما تذكرت بعدك عني

ن .. ناء أنا عن مضايقتك

هـ .. هائم أنا في عشقك

و .. وليد لحظة رؤيتك

ي .. يا من أحبها بجنون